баклава (ж.)
Старата анама, што на млади години сучела баклави за самиот Џеладин-бег, таа беше дојдена уште од петокот со три други анами и до саботата вечер не исправија грб од кр’говите и не ги оставија сукалата од раце.
„Бојана и прстенот“
од Иван Точко
(1959)
А зошто би јал качамак кога имал печено јагне и баклава? - одговори вториот партизан.
„Волшебното самарче“
од Ванчо Николески
(1967)
Ќе ја менам верата и ќе се потурчам. Турците јадат баклава, татлии, локуми и се гостат со слатко и благо.
„Волшебното самарче“
од Ванчо Николески
(1967)
Додека беа на прошетка мама Злата го подготви ручекот: имаше од питата, сарма од зелка, печено пиле и баклава - тоа беше вистински празничен ручек. ***
„Тополите на крајот од дедовата ливада“
од Бистрица Миркуловска
(2001)
Перките на вентилаторот се вртеа, се вртеа и лимоните во големата тегла со природна лимонада, долгиот излог на ладилникот беше нареден со тулумби, кадаиф, баклави, еклери, шампити, кифлички и колачиња, а празните масички со лажен мермер ги чекаа учениците, а особено ученичките од големиот одмор во блиската гимназија.
„Синовски татковци“
од Димитар Солев
(2006)
Вратите на собата беа во чудесна резба, како и долапите и мусандрите, а дрвените тавани со форми на баклави, позлатени и обоени во разни бои.
„Вежби за Ибн Пајко“
од Оливера Николова
(2007)
Сака да отвори дуќан за сладолед и шербет, и што иде со тоа: ашуре, сараклии, локум и салеп, боза, кадаиф и баклави.
„Вежби за Ибн Пајко“
од Оливера Николова
(2007)
Ја гледате со прашален поглед, а таа ви вели дека јадела баклава.
„Азбука и залутани записи“
од Иван Шопов
(2010)
Тие оставаат големи суми у тангите на танчариците додека нивните домаќинки замотани у шамии им праат баклави и тулумби по дома.
„Двоглед“
од Горан Јанкуловски
(2011)
Таму да му играат чочеци и на крајот од играта да му го заблажат пофтежот со баклави и кадаиф.
„Светилничар“
од Ристо Лазаров
(2013)
Големиот везир Нуман Ќуприли, само неколку дена пред својата пропаст, ќе ја прими горката баклава.
„Балканвавилонци“
од Луан Старова
(2014)
Општиот назив продолжи Камилски за специјалниот вид ориентални теста попарени со шербет е зборот татлија (турски tatli), а познатите заемки за означување разни видови татлии се: баклава (од турски baklava), реванија, раванија (од турски revani), кадаиф (од турски kadaif), шеќерпаре (şeker pare); тулумба (од турски tulumba).
„Балканвавилонци“
од Луан Старова
(2014)
Именувањето или промената на големите везири, неретко ќе бидат најавувани со големи тепсии баклава.
„Балканвавилонци“
од Луан Старова
(2014)
